De Jacques Ferry a séng Ierwen

1706-1766
 
 

Obwuel dem Chevalier säin Drockmonopol an der Stad eréischt 1706 auslafe sollt an hie protestéiert huet, krut de Jacques Ferry vu Metz den 12. Januar 1703 d'Erlaabnes, fir an der Stad Bicher ze drécken - am Joer, wéi de Chevalier seng Zeitung La Clef du cabinet des princes ufoung. De Ferry hat sech mam Magdalena Georg bestued a gouf den 9. Februar 1703 Bierger vun der Stad.
An der Konkurrenz mat der grousser Dréckerei Chevalier huet de Ferry meescht nëmme Klengegkeete gedréckt. Nodeems de Chevalier viru Geriicht Onrecht krut, krut de Ferry den 1. Oktrober 1706 vu Bréissel seng Drockerlaabnes konfiméiert. Den 3. Juli 1709 krut hien de Privileg, fir als eenzegen dierfen d'Gemeine Landsbräuche ze drécken. Dat wor alt e klengt séchert Akommes.
De Jacques Ferry ass de 17. Juni 1728 gestuerf. Säi Jong Jean Baptiste Ferry huet d'Dréckerei virugefouert, vu 1731 un ënnert sengem eegenen Numm. Ma och hien ass schons de 27. Januar 1736 mat 31 Joer gestuerf.
Seng Schwëster Elisabeth Catherine Ferry huet sech 1743 mam Jean-Baptist Kleber bestued, deen eng Zäit an hirer Dréckerei geschafft hat. D'Koppel huet mat deenen aneren Ierwen zesummen d'Geschäft gefouert, bis se sech 1747 selbstänneg gemaach an d'Dréckerei Kleber gegrënnt huet. Déi lescht Ierwen si weidergefuer, 1752 mat enger eenzeger Press, a 1766 huet d'Dréckerei Ferry opgehal.
 

(rh.)

1710 (Jean de Benninck:) Die gemeine Lands-Bräuche des Hertzogthums Lützteburg und Graffschafft Chiny

1710 Bernard Buringer: Serta moralia a concionatoribus in die commemorationis fidelium, an 9 Bänn

  (rh.)

1752 vläicht och beim Ferry gedréckt , ma ouni Numm vun enger Dréckerei,Thomas Joseph Moult: Prophéties perpétuelles (...) À Luxembourg, se vend chez Marechal, Marchand Libraire, Prophezeiungen aus dem 13. Jorhonnert, déi bis an d'Joer 2024 reechen